Îbrahîm Gurbuz
Wergera Soranî ya Sokratesê Serdema Me Îsmaîl Beşikçî derket!
Pirtûka nivîskar Îbrahîm Gurbuz a bi navê Çağımızın Sokratesi İsmail Beşikci, ku jiyan, têkoşîn û cîhana ramanî ya civaknas Dr. Îsmaîl Beşikçî vedibêje, bi zaravayê soranî çap bû û gihîşt destê xwendevanan.
Ev berhem ji aliyê Mîhraç Mistefa ve hatiye wergerandin û ji aliyê Weqfa Xêrxwaziyê ya Barzanî (BCF) ve hatiye çapkirin. Bi vê wergerê, xwendevanên soranî derfetê dibînin ku jiyan û ramanên zanyarekî ku temenê xwe li ser lêkolîn, rastî û berevaniya mafên gelê Kurd daniye, ji nêz ve nas bikin.
Pirtûk şahidiya jiyaneke tijî ked, cesaret û pabendiya bi rastiya zanistî re dike. Di rûpelên wê de, helwesta rewşenbîrekî ku li hember înkar û zordestiyê bêdeng nemaye û tevî zext û cezayan ji rêya xwe venegeriyaye, derdikeve pêş.
Hêjayî gotinê ye ku ev pirtûk bi tirkî hatiye nivîsîn; wergera wê ya îngilîzî berê, ya kurmancî jî çend roj berê gihîştibû destê xwendevanan. Niha, bi çapkirina wergera soranî, ev berhem digihîje xwendevanên bêhtir û di navbera zaravayên Kurdî de pireke nû ya zanîn û naskirinê ava dike.
Em hêvî dikin ku ev çap bibe wesîleyek ji bo naskirina kûrtir a raman û têkoşîna Îsmaîl Beşikçî, bi taybetî di nav nifşên ciwan de. Spas ji wergêr û hemû kes û saziyên ku di gihandina vê berhemê de ked dane.
Foundation For Kurdish
Library & Museum